Kebak rereged, kaya tresnamu
lungiting asmara mung nalikane mabuk candhu
saknyatane keli nututi banyu kali
wadon setengah tuwa ngrakit tembang
mandeng surupe srengenge pinggir kali Bagan
lebur ing gebyure banyu katerak prau
nithir warta sangka manca
wisik angin bengawan ngemu pitakon
sapa kang yekti kelangan
sumilak kali Bagan kapiyak crita, cidra
musna kaya angslupe bagaskara
ngendi janjimu bakal angreronce kembang
kasetyanmu marang Lasem tanah perdikan
lemah sawiji leburing kamanungsan sayekti
musna prasetyamu kagulung ombak segara
mawur ora beda pasir pesisir
kapan bali ngrakit gurit
jejingkrakan ngudang Laesan
Lasem, 24 Februari 2012
Tidak ada komentar:
Posting Komentar