By: Allief Billah
Wengi Kang Cinidra
Rinengkuh dening wengi kang atis
mamring tanpa lintang lan rembulan
peteng dhedhet lelimengan
ora kaya wingi uni
ing wengi kang pungkasan
tak aras pipimu
lan tak kanthi tanganmu
sutra putih kang wus ginelar
katiup angin wengi lir kadya
tangan widadari ngawe awe
katon wus sirna ing sabar
nganti aku lan sliramu campuh ing rasa
nyawiji tunggal rasa kinanthi kidung asih
lembar mbaka lembar nganti ora kasariran
engga oncat jiwa kagiring rasa
ngulandara mring kayuwanan
campuh ing rasa luluh sampyuh
sirna sampurna nunggal rasa
nyawiji siji musna raga uga donya
gumregah langkah mijil janji
ora bakal ninggal mbaka siji
wengi kang nganthi aku uga sliramu nyawiji
nanging jebul janji
kagulung rerupek ati
goda samirana wewangen donya
wit witan wengi iki katon ngece
kepingkel gumuyu ningali pasuryanmu
kang katon suwung rinangkul pedhut
samar ngemu pitakon
ngelingake janji setya tuhu
marang wengi kang cinidra
Rembang, 28 Agustus 2010
Langganan:
Posting Komentar (Atom)
Tidak ada komentar:
Posting Komentar