Dewi Pepujaning Ati

By: Allief Billah

Dewi Pepujaning Ati

Tumetesing embun wengi iki
ora kaya wingi uni
nalika tanganmu tak kanti
miyak petenging ratri
: memuji

ora krasa luh tumetes ing dadaku
nganti teles kebes ngrasakake
ringkihing ati raga lan jiwa amarga
rumangsa tansah kagoda gumebyaring donya

duh katresnanku lilanana
aku lunga ngupadi pepadhanging ati
tumungkul nyawiji mrih rahayu jati
ora mung lamis ing sak kebaking lambe

Dewi lilanana
aku pasrah sumarah
karana rumangsa wirang
tansah memuji mring gusti
nanging mung ana pucuking lati.

luhmu tumetes ngebaki dadaku kang matu
ewuh aya pambudimu duh katresnanku
sabar anggonmu leladi ngupadi kamulyan jati

gawang gawang katon pasuryanmu
byar sumunar dadi pepadhanging atiku
peteng gumeleng lelakonku
tanpa sliramu kang tansah dadi pepujanku

Dewi lungaku ngupadi pepadahang dalan
waluya jati, jati temah nirmala